شعرترکی فراق مادر

شعرترکی درفراق مادر

سنسیز اولدی اورگیم غملره کاشانه آنا

گوز یاشیم زینت اولور هر گجه دامانه آنا

سونمه ای عشقی منه عمریده عزّت چراغی

منده شوقیله اولوم باشووه پروانه آنا

گنج قارونی اگروئرسه لر عالمده منه

وئرمرم بیر باخشون آند اولا یزدانه آنا

دامن همّتون اولدی بالانون معراجی 

سنده آری واریمش همّت مردانه آنا

نَفَسون عین شفادور باخشون درده دوا

بیرده باخ لطفیله بو دیده سی گریانه آنا

سنیدون موج حوادثده منه ساحل اولان

دوشموشم سندن اوزاق گور نجه طوفانه آنا

آیریلق فصلی بو گُل صورتی بیر حاله سالیب

دوشموشم برگ خزان مثلی گلستانه آنا

من اوجا لدیقجا قوجالدون بو حقیقتدی ولیک

اهلی آنلاربونی، ئوزگه بیلر افسانه آنا

گجه لر یاتمامیسان تا که یاتام نازیله من

یاتمیان گوزلروین دردین آلیم جانه آنا

چوخ گجه بالش ائدوبسن قولووی صبحه کیمی

جان دئیوبسن منه ای عشقیده جانانه آنا

ایوون آباداولا ای قلب ایوین اباد ائلین

سن گیدن وقتن اولوب قلب ایوی ویرانه آنا

چوخ دوتوبسان الیمی تا که دوروب یول یئریم

ایندیده لطف ائله بو قامتی لرزانه آنا