شعر ترکی خان ننه(استادشهریار)

شعر ترکی خان ننه(استادشهریار)

خان ننه ، هایاندا قالدین 

بئله باشیوا دولانام

  نئجه من سنی ایتیردیم !

دا سنین تایین تاپیلماز

سن اؤلن گون ، عمه گلدی

منی گتتدی آیری کنده

من اوشاق ، نه آنلایایدیم ؟

باشیمی قاتیب اوشاقلار

نئچه گون من اوردا قالدیم

قاییدیب گلنده ، باخدیم

یئریوی ییغیشدیریبلار

نه اؤزون ، و نه یئرین قالیر

« هانی خان ننه م ؟ » سوروشدوم

دئدیلر کی : خان ننه نی

آپاریبلا کربلایه

کی شفاسین اوردان آلسین

سفری اوزون سفردیر

بیرایکی ایل چکر گلینجه

نئجه آغلارام یانیخلی

نئچه گون ائله چیغیردیم

کی سه سیم ، سینم توتولدو

او ، من اولماسام یانیندا

اؤزی هئچ یئره گئده نمه ز

بو سفر نولوبدو ، من سیز

اؤزو تک قویوب گئدیبدیر ؟

هامیدان آجیق ائده ر کن

هامییه آجیقلی باخدیم

سونرا باشلادیم کی : منده

گئدیره م اونون دالینجا

دئدیلر : سنین کی تئزدیر 

امامین مزاری اوسته

اوشاغی آپارماق اولماز

سن اوخی ، قرآنی تئز چیخ

سن اونی چیخینجا بلکه

گله خان ننه سفردن

ته له سیح راوانلاماقدا 

اوخویوب قرآنی چیخدیم

کی یازام سنه : گل ایندی

داها چیخمیشام قرآنی

منه سوقت آل گلنده

آما هر کاغاذ یازاندا

آقامین گؤزو دولاردی 

سنده کی گلیب چیخمادین

نئچه ایل بو اینتظارلا

گونی ، هفته نی سایاردیم

تا یاواش – یاواش گؤز آچدیم

آنلادیم کی ، سن اؤلوبسن !

بیله بیلمییه هنوزدا

اوره گیمده بیر ایتی ه وار

گؤزوم آختارار همیشه

نه یاماندی بو ایتیکلر

خان ننه جان ، نولایدی

سنی بیرده من تاپایدیم

او آیاخلار اوسته ، بیرده

دؤشه نیب بیر آغلایایدیم

گولی حلقه سالمیش ایپ تک

او ایاغی باغلی یایدم

کی داها گئده نمییه یدین

گئجه لر یاتاندا ، سن ده

منی قوینووا آلاردین

نئجه باغریوا باساردین

قولون اوسته گاه سالاردین

آجی دونیانی آتارکن

ایکیمیز شیرین یاتاردیق

یوخودا ( لولی ) آتارکن

سنی من بلشدیره ردیم

گئجه لی ، سو قیزدیراردین

اؤزووی تمیزلیه ردین

گئنه ده منی اؤپه ردین

هئچ منه آجیقلامازدین

ساواشان منه کیم اولسون

سن منه هاوار دوراردین

منی سن آنام دوینده

قالپیپ آرادان چیخاردین

ائله ایستی لیح او ایستک

داها کیمسه ده اولورمی ؟

اوره گیم دئییر کی : یوخ – یوخ

او ده رین صفالی ایستک

منیم او عزیزلیغیم تک

سنیله گئدیب ، توکندی

خان ننه اؤزون دئییردین

کی : سنه بهشت ده ، الله

وئره جه ک نه ایستیور سن

بو سؤزون یادیندا قالسین

منه قولینی وئریبسه ن

ائله بیر گونوم اولورسا

بیلیرسن نه ایستیه رم من ؟

سؤزومه درست قولاق وئر :

سن ایله ن اوشاقلیق عهدین

خان ننه آمان ، نولیدی

بیر اوشاخلیغی تاپایدیم 

بیرده من سنه چاتایدیم

سنیلن قوجاقلاشایدیم

سنیلن بیر آغلاشایدیم

یئنیدن اوشاق اولورکن 

قوجاغیندا بیر یاتایدیم 

ائله بیر بهشت اولورسا 

داها من اؤز الله هیمنان

باشقا بیر شئی ایسته مزدیم