شعرترکی بی وفایی دنیا

شعرترکی بی وفایی دنیا 

دقیقه لر قوتارار ماه وساله آلانما

گئجه گونوز دولانار صبحده مساده گئدر

آتا آنان نه قدر ئولمیوبله زنده دیلر

آماندی قدرینی بیل آتا آناده گئدر

اولار که عمریده سنلن همیشه باهمدی

وفا چراغی گئچر یار وآشناده گئدر

طبیعتین ایشیدی یاری یاریدن آییرار

وصال هجر دونر عشق ماوراده گئدر

جوانلیقیندا ولی اولما زور وه مغرور

قولین گوجی آزالار جسمدن قواده گئدر

زمان یلی چمن عمری تارومار ایلر

گله تبسم ائدن چهره دن صفاده گئدر

گوزل دیوبله گوزلیک گوزللره قالماز

دونر قیافه آیا بنزین لقاده گئدر

علامت قوجالیقدی باشین توکی آغارار

ئوزون اتی قریشار حسن دلرباده گئدر

اولار که زمزمه ایلله لحن دلکشیله

طنین سس آزالار صوت دلگشاده گئدر

دوشر ایاقدان اگر قهرمان عالم اولا

دوراندا دیزلر اسر الده کی عصاده گئدر

ئولوم توزی گوزه پرده چکر قولاق توتولار

نفس شماره دوشر دل دورار صداده گئدر

صاقا صولا نگران هی باخار بیرین تانیماز

ایکی گوزی دورانه دوشر ضیاده گئدر

اجل کمینده گزیر بیرخبر اوتورماگیلان 

یاخاوی دوتسا ئولوم گاه التجاده گئدر

حلال چورک قازانیب یه حرامه آلانما

آغیزدا طعم دونر لذت غذاده گئدر

آزا قناعت ائله چوخ باشا بلا گتیرر

میانه رو یاشا مفلسده اغنیاده گئدر

تومنی بش قرانا وئرمه ارزشی یوخدی

نه تک الینده کی پول یغدیغین رباده گئدر

بیر آغ کفندی سنه قسمت اولسا مالیندن

که یعنی ثروت بی حد وانتهاده گئدر

چالیشما وارثه حد شریعتی گوزله

بوله له وار یوخی نقره وطلاده گئدر

عیالین آغلاسا بیر گون اورکدن آغلیاجاق

ایکیمجی گون کسیلوب ناله ونواده گئدر

دونر اوچومجی گونه آغلاماق سسی کسیلر

بساط غم یغیشوب مجلس عزاده گئدر

ائلیکه هفته ده گئچدی ایاق چکر قونشی

یواش یواش داغیلیب خویش واقرباده گئدر

زمانه دفتریوی ،،سوته دل،،ائدرپاره

سینار یازان قلمین شعریدن جلاده گئدر