شعرترکی عبرت نامه

شعرترکی عبرتنامه

ای بشر،عالمه سلطان اولاسان گیتمه لی سن

صاحب  مُلک سلیمان اولاسان گیتمه لی سن

بیر تَفَکُّر ایله گور خلقتیوین سِرّی ندی

خاک تیره،مه تابان اولاسان گیتمه لی سن

عُمر نوح اولسا نصیبون بو فنا دنیاده

شُهره ی  عالم امکان اولاسان  گیتمه لی سن

مسخره ایلمه گولمه بیرینین صورتینه

حُسنوده یوسف کنعان اولاسان گیتمه لی سن

قالمادی حضرت موسایه ده فانی دنیا

طور سیناده نگهبان اولاسان گیتمه لی سن

مصطفی تک بشره  دنیا وفا ایلمدی

ختم پیغمبره دربان اولاسان گیتمه لی سن

هانی گور  فاتح خیبر کیمی شیر غزوات

موهبتده  شه مردان اولاسان گیتمه لی سن

 گور  یزیدی اولوسان یا که طرفدار حسین

دشمن و حامی قرآن اولاسان گیتمه لی سن

چوخدا فخر ایلمه ئوز  دولتیوه  قدرتیوه

دهریده رستم دستان اولاسان گیتمه لی سن

قویما مغرور ایلیه چوخدا  سنی  پُست و مقام

آمر  و تابع فرمان اولاسان گیتمه لی سن

متواضع بشر اُول، اولماگیلان اهل غرور

نه  قَدَر فخریلی انسان اولاسان گیتمه لی سن

اللها  ایله عبادت نه قَدَر  وار  نفسون

طالب و مُنکِر ایمان اولاسان گیتمه لی سن

گیدیسن مَکّیه گل حرمتینی  حفظ ایله

میشه قربان حاجی قربان اولاسان گیتمه لی سن

منظوریم بیر بیله سوزدن  بودی ای بنده اینان

باغ عشرتده غزلخوان اولاسان گیتمه لی سن

 چوخلارین چرخ فلک گولدیروب آغلار قویدی

غنچه تک عمریده خندان اولاسان  گیتمه لی سن

ایندی که حقدی ئولیم محشره سرمایه قازان

صاحب مال فراوان اولاسان گیتمه لی سن

کاخ و ویلاده اوتور قبر ایوینی یادیوه سال

عاقبت  خاکیله یکسان اولاسان گیتمه لی سن

اجلین وقتی یتیشسه قاچاجاقسان   هایانا

عازم دشت و بیابان اولاسان گیتمه لی سن

هارا گیتسون سنی بیرگون تاپاجاخ عزرائیل

یرین آلتیندا دا پنهان اولاسان گیتمه لی سن